Majambazi wafanya kufuru Dar

*Wamuua sonara mchana kweupe *Kisha risasi yamjeruhi mwenzao Na Waandishi Wetu, Magomeni WATU wanne wanaodhaniwa kuwa ni majambazi wamemuua kwa kumpiga risasi kifuani sonara Faidh Hassan (28), mkazi wa Magomeni Mapipa.Kwa mujibu wa mashuhuda wetu, tukio hilo limetokea jana saa 4 asubuhi baada ya kuvamiwa na watu wanaodhaniwa kuwa majambazi waliokuwa wakitumia gari aina ya Rav 4 ambalo namba zake bado hazijafahamika. Imedaiwa kuwa majambazi hao wakiwa ndani ya gari hilo walishuka kisha wengine kwenda kwenye ATM moja iliyopo maeneo hayo ambapo baadhi ya watu walidhani kuwa huenda ni wateja. Wengine walikwenda kwenye duka la sonara linayofahamika kwa jina la AL-Hassan kisha kutoka nje na wakati wakijiandaa kupanda gari lao, ghafla risasi ilifyatuka na kumjeruhi mguuni dereva wao. Baada ya watu kufurika eneo hilo ili kujua nini kinaendelea walishangaa watu wakitoka katika duka hilo huku wakibubujikwa na machozi. Imedaiwa kuwa ilibainika kuwa sonara huyo amefariki baada ya kupigwa risasi na majambazi hao. Kamanda wa Polisi Mkoa wa Kinondoni, Charles Kenyela, alipopigiwa simu kuthibitisha tukio hilo alisema yupo kwenye kikao atalitolea ufafanuzi baadaye.