Uteuzi wa mameya umakini utawale

Na Mhariri

10th December 2010

Leo Kamati Kuu ya Chama Cha Mapinduzi (CCM) inakutana pamoja na mambo mengine kupitisha majina ya wanachama wake walioomba kuteuliwa kuwania nafasi za uenyekiti na mameya wa halmashauri mbalimbali nchini.

Tunajua kwamba shughuli hii ni ya chama, kwa maana kwamba CCM inakaa kujadili wanachama wake, lakini tunapotazama majukumu ya hao watakaopitishwa tunaona kwamba ni wajibu wa umma ambao kila mwananchi kwa njia mmoja au nyingine ataguswa na utendaji wake.

Kwa kiwango kikubwa shughuli hasa za maendeleo ya wananchi zipo ndani ya halmashauri, ndiko wanakoishi wananchi waliowengi, ndiko huduma nyingi za kijamii zimepelekwa na kwa sasa ndiko asilimia kubwa ya bajeti ya serikali inapelekwa.

Ukizungumzia habari za elimu utagundua kwamba sasa elimu ya msingi na sekondari sasa inasimamiwa na halmashauri hizi, ni hivyo hivyo kwa huduma za afya na hata maji; katika mpangilio kama huo, shughuli za halmashauri zinagusa maisha ya wananchi moja kwa moja pengine kuliko ilivyo kwa wizara ambayo iko mbali kwa maana ya utekelezaji wa majukumu yake mbalimbali siku kwa siku.

Ni kwa kutazama majukumu ya halmashauri kwa jinsi hiyo ndiyo maana mkutano wa leo wa Kamati Kuu ya CCM unaacha kuwa ni shughuli ya chama kwa ajili ya wanachama wake tu kuwa shughuli ya kila mwananchi kwa kuwa inahusu uteuzi wa wenyeviti na mameya wa halmashauri zinazowagusa moja kwa moja.

Kwa muda mrefu sana serikali imekuwa ikilalamika juu ya kuwepo kwa udhaifu mkubwa katika kusimamia halmashauri nchini; mabaraza ya madiwani aghalabu yamelaumiwa pia kujitumbukiza katika majukumu ya watendaji, na kibaya zaidi wamejihusisha katika vitendo vya ukiukaji miiko ya uongozi.

Wapo madiwani ambao wanafukuzia zabuni ambazo zinaangukia moja kwa moja kwenye usimamizi wao, wapo wanaowabeba washirika wao wapate zabuni kwa nia ya kulipana fadhila. Kwa kifupi kuna mkoroganyo mkubwa na unaokinaisha ndani ya halmashauri nyingi nchini.

Hali hii inapotazamwa na maamuzi ya serikali ya kuzidi kuongeza fungu la fedha kwenda kwenye halmashauri, unapokuwa na viongozi wa halmashauri ambao maadili ni msamiati usiojulikana kwao, maendeleo ya wananchi hayawezi kufikiwa kirahisi ingawa fedha zinatengwa na kutolewa na serikali.

Ndiyo maana basi sisi tunasema Kamati Kuu ya CCM katika kikao chake cha kupitia na kupitisha majina ya wanaotaka madaraka ndani ya halmashauri hizi ni lazima waongozwe na kitu kimoja, je, kila aliyeomba anafaa kuwa kiongozi kweli na kweli anakereketwa na shida za wananchi au ni msukumo wa kutafuta kula?

Hili litawezekana kama tabia ya kubebana, kufumbiana macho katika ukiukaji wa maadili na kanuni za uongozi itawekwa kando katika kikao hiki kwa lengo la kupata viongozi bora ngazi ya halmashauri.

Ukitafakari kwa kina matatizo mengi ya wananchi hayatatuliwi kwa sababu tu ya kuwa na viongozi wa halmashauri ambao ama hawajui wajibu wao au kama wanajua basi wamefumbwa macho na maslahi binafsi hivyo kujikuta wakishindwa kutekeleza wajibu wao sawasawa.

Tunadhani CCM kama chama tawala sasa kinatambua kwamba umma umekwisha kuamka vya kutosha, wananchi sasa wanajua haki zao, wanafuatilia mambo mbalimbali yanayohusu maisha na ustawi wao sasa na baadaye kwa karibu sana, kama hali ni hiyo tunadhani ni angalizo muhimu kwa Kamati Kuu kuwa makini leo.

Kila mwananchi anaamini kwamba kila kitu kinawezekana katika nchi hii kama viongozi watakuwa makini na kuonyesha njia. Ni kwa kuwa na viongozi bora tu ndipo tutaweza kukabiliana na changamoto nzito zinazotukabili kama taifa. Uongozi bora hujitenga na kila aina ya upendeleo.

Kwa kuwa CCM ilishinda katika halmashauri nyingi zaidi nchini inawajibika sasa kuhakikisha kwamba uongozi unaoombwa kwenye halmashauri hizo ni madhubuti ili uweze kusimamia rasilimali za taifa kwa lengo la kuleta mabadiliko ya kweli. Huu ni mzigo wa Kamati Kuu ya CCM leo.

CHANZO: NIPASHE