Maalim Seif awa kivutio sherehe za uhuru

Send to a friend

0digg Rais Jakaya Kikwete, akisalimiana na Makamu wa Kwanza wa Rais wa Zanzibar Mallim Seif Shariff Hamad, wakati wa sherehe za miaka 49 ya Uhuru kwenye Uwanja wa Uhuru Dar es Salaam jana. katikati ni Makamu wa Rais wa Jamhuri ya Muungano Mohamed Gharib Bilal na kulia ni Rais Mstaafu awamu wa tatu Benjamin Mkapa. Waandishi Wetu MAKAMU wa Kwanza wa rais wa Zanzibar Maalim Seif Sharif Hamad, jana alikuwa miongoni wa vigogo watatu wa serikali waliong’ara kwenye sherehe za Uhuru wa Tanzania Bara. Viongozi wengine waliong’ara kwenye sherehe hizo zilizofanyika kwenye uwanja wa uhuru jijini Dar es Salaam, ni Waziri Mkuu Mizengo Pinda na Spika wa Bunge Anne Makinda. Katika sherehe hizo zenye kaulimbiu ya ‘Miaka 49 ya Uhuru tudumishe uzalendo’, zilizohudhuriwa na maelfu ya wakazi wa jiji wa Dar es Salaam, viongozi hao waling'ara baada ya kushangaliwa kwa mbwembwe walipokuwa wakiingia uwanjani. Maalim Seif ambaye jana ilikuwa mara yake ya pili kuingia uwanjani hapo baada ya kuhudhuria sherehe za kuapishwa kwa Rais Kikwete Novemba 6 mwaka huu, alivutia hisia za watu walioshiriki sherehe hizo za uhuru ambao walimshangilia kwa takriban tano baada ya kutambulishwa. Baada ya mshereheshaji kutaja jina la Maalim Seif, umati wa watu ukiongozwa na vikundi vya hamasa vilivyoketi kwenye jukwaa la kijani, ulisimama na kuanza kushangilia. Shangwe za kumpongeza kiongozi huyo ziliendelea hadi alipoketi, katika nafasi yake. Hata hivyo kikundi cha uhamasishaji toka Temeke, kilionekana kumshangilia zaidi kiongozi huyo ambaye pia ni Katibu Mkuu wa Chama cha Wananchi CUF. Spika Makinda, aliwasili uwanjani hapo saa 3:25 asubuhi na kupokelewa kwa shangwe na umati wa watu uliokusanyika uwanjani hapo. “Salamu kwa spika waheshimiwa wabunge, ‘Mheshimiwa spikaaa’” zilisikika sauti hizo kutoka kwenye jukwaa lililokuwa limekaliwa na vijana kutoka Wilaya ya zote tatu za Mkoa wa Dar es Salaam. Mbali na vijana hao wananchi wengine pia waliojitokeza uwanjani hapo, waliendelea kumshangilia zaidi Makinda wakati alipowasili uwanjani hapo. Waziri Mkuu Mzengo Pinda alipokewa uwanjani hapo kwa shangwe za aina yake huku wengine wakiimba ‘mwana wa mkulima..’ Baadhi ya wananchi hao, walisikikika wakimsifu Pinda kwa kitendo chake cha kulikataa gari la kifahari alilopewa kulitembelea. “Jamaa kapewa lishangingi (gari) akalikataa bwana,” mmoja wa watu hao alisikika akimweleza mwenzake huku hoja hiyo ikionekana kuwavutia wengi waliokuwa wamemzunguka. Rais Mstaafu Benjamin Mkapa alikuwa miongoni mwa viongozi walioanza kuingia uwanjani hapo akifuatiwa na Rais Mstaafu wa serikali ya Mapinduzi ya Zanzibar Abeid Amani Karume. Mke wa Rais mama Salma Kikwete aliingia uwanjani hapo baada ya marais hao wastaafu akifuatiwa na Waziri wa Mambo ya Ndani ya Nchi Shamsi Vuai Nahodha na baadaye Spika wa Bunge, Anne Makinda. Makamu wa pili wa Rais wa Zanzibar Balozi Seif Iddi, aliingia uwanjani hapo akifuatiwa na Makamu Kwanza wa Rais wa Visiwa hivyo Seif Sharif Hamad aliyekuwa ndani ya  gari aina ya Benzi yenye rangi nyeupe. Baada ya viongozi hao wa Zanzibar kuingia, alifuatia Waziri Mkuu Mizengo Pinda, Rais wa Zanzibar Dk Mohamed Shein na baadaye Makamu wa Rais, Dk Ghalib Bilal. Rais Jakaya Kikwete ambaye ndiye mgeni rasmi katika sherehe hizo, aliingia uwanjani hapo saa 4:00 asubuhi na gari la wazi ambalo lilizunguka uwanja mzima kumpa fursa ya kuwasalimia wanachi. Kikwete aliwasili uwanjani hapo akiongozana na Mkuu wa Majeshi, Davis Mwamunyange na kusindikizwa na na pikipiki 12. Kamanda wa gwaride  Jenerali Venance Thomas  alimkaribisha rais Kikwete na mkuu wa Majeshi kukagua gwaride hilo kabla ya kurudi katika jukwaa kuu na baadaye Kamanda huyo aliliongoza gwaride hilo  kutoa heshima kwa rais. Vikundi vya gwaride vilivyo kuwepo uwanjani hapo vilifanya gwaride  la heshima kwa mpangilio wa makundi. Kikundi cha bendera ndicho kilichoongoza vikundi vingine katika gwaride hilo kilifuatiwa na kikundi cha Jeshi la nchi kavu wanaume, Jeshi la maji, Jeshi la nchi kavu wanawake na kufuatiwa na JKT, Wanaume. Kundi la saba ni la JKT Wanawake, Jeshi la polisi wanaume, Jeshi la Polisi wanawake , Jeshi la Magereza wanaume na Magereza wanawake. Shughuli hiyo ya gwaride ilifanyika katika kipindi cha dakika 30 huku ndege mbili kutoka Ngerengere  mkoani Morogoro, zikiwa zinazunguka angani kutoa heshima. Baada ya gwaride hilo kumalizika vikundi hivyo vya jeshi vilipiga hatua 15 kwenda mbele kwa heshima na ukakamavu mkubwa wakifuatiwa na wimbo wa taifa huku ndege mbili za kijeshi zikizunguka tena angani na baadaye kamanda wa gwaride alilitoa gwaride nje ya uwanja vikifuatiwa na kundi la bendi. Suala lilivuta hisia za wengi ni kuzirai watu kadhaa kutokana na milio ya mizinga 21 aliyopigiwa rais Kikwete baada ya kumaliza kuwapungia mikono wananchi. Baada ya kupigwa mizinga hiyo, Rais Kikwete alianza kukagua gwaride la vikosi mbalimbali vya ulinzi na usalama na kisha, kupanda jukwaa kuu na kusalimiana na viongozi mbalimbali. Baada ya gwaride la vikosi vya ulinzi kutoa heshima kwa rais, vilitoka nje ya uwanja huo na kutoa fursa kwa watoto 700 walioandaliwa kwa shughuli ya halaiki kuingia uwanjani. Watoto hao wa halaiki, walikuwa kivutio kutokana na umahiri waliouonyesha katika kuchora michoro mbalimbali. Pia walionyesha mbinu za kujilinda, kujihami ambapo pia waliandika neno  Uhuru 1961 hadi 2010,  tudumishe Uzalendo miaka  49. Watoto hao waliokuwa katika makundi yaliyovaa sare za rangi mbalimbali zilizopo katika bendera ya Tanzania,  walichora umbo la nusu duara na mshale kulingana na rangi za nguo zao. Habari hii imeandaliwa na Freddy Azza, Geofrey Nyang’oro na Elizabeth Ernest.Source Mwananchi