Jaji Mkuu asema Katiba Mpya inazungumzika

Na Hellen Mwango

10th December 2010

 

  Apendekeza Serikali ifanye utafiti wa kina kwanza
  Akwepa kuzungumzia Katiba ya Zanzibar

Jaji Mkuu wa Tanzania, Agustino Ramadhani

Jaji Mkuu wa Tanzania, Agustino Ramadhani amesema suala la Katiba mpya linazungumzika.

Kauli hiyo aliitoa jijini Dar es Salaam jana wakati akizindua Mtandao wa watoa huduma za msaada wa kisheria nchini (Tanlap) unaojumuisha taasisi mbalimbali za kiraia.

Jaji Ramadhani alipendekeza kuwa ili kupata Katiba hiyo mpya itakayowaridhisha wananchi wote, lazima Serikali ifanye utafiti wa kina kujua mambo yanayowakera ili yafanyiwe kazi na kurekebishwa.

Alisema suala la kuandikwa Katiba hiyo linazungumzika lakini alikataa kulizungumzia kwa kina zaidi akisema anaheshimu sana sheria na taratibu za nchi.

" Mimi nashauri yatafutwe yale yanayowakera sana wananchi yafanyiwe kazi na kurekebishwa … suala hilo linazungumzika lakini siwezi kulizungumzia kwa undani sana naheshimu Sheria na Katiba ya nchi," alisisitiza.

Kuhusu Katiba ya Zanzibar, vilevile alikataa kuzungumzia kwa kusema kuwa bado hajaisoma.

" Sijasoma Katiba ya Zanzibar nimeagiza waniletee niisome lakini bado haijanifikia hadi sasa kwa hiyo siwezi kuongelea chochote kwa sababu sijaiona," alisema.

Akizungumzia suala la utoaji huduma za sheria, Jaji huyo alisema Tanlap kwa kuweka mpango wa miaka mitano ya kutoa msaada wa kisheria hasa vijijini itawasaidia wananchi wenye kipato kidogo wanaotafuta haki zao kuipata.

Alisema wananchi wengi hasa vijijini wanapata matatizo lakini hawana uwezo wa kuwalipa mawakili, hivyo mtandao huo utawasaidia kujua ni namna gani haki inapatikana.

Naye Mwenyekiti wa Bodi ya Tanlap, Dk. Judith Odunga, alisema mpango huo wa miaka mitano unalenga kuwasaidia wananchi wote hasa wa vijijini ambao wanakosa huduma hiyo kwa kukosa kipato.

Kwa mujibu wa Odunga, lengo la kutoa huduma hiyo ni kuikumbusha Serikali iweze kusaidia na kushiriki kuhudumia wananchi walioko vijijini.

CHANZO: NIPASHE