Kikwete azindua kitabu kuhusu maisha yake

Na Muhibu Said

10th December 2010

  Ammwagia sifa Jaji Warioba kwa kumpeleka serikalini

Rais Jakaya Kikwete, akizindua kitabu kinachoelezea maisha yake ya kisiasa jana Ikulu jijini Dar es Salaam, huku mkewe Salma Kikwete akishuhudia kulia na mtunzi wa kitabu hicho, Profesa Julius Namg'oro. (Picha na Khalfan Said)

Rais Jakaya Kikwete, amezindua kitabu kinachoelezea wasifu wake na kummwagia sifa Waziri Mkuu Mstaafu, Jaji Joseph Warioba kuwa ndiye aliyempeleka serikalini na kufanikiwa kufika aliko hivi sasa.

Alisema hayo katika hafla ya uzinduzi huo iliyofanyika Ikulu jijini Dar es Salaam, hafla ambayo ilihudhuriwa na Makamu wa Rais, Dk. Mohammed Gharib Bilal, Waziri Mkuu, Mizengo Pinda, Jaji Warioba, baadhi ya mawaziri, viongozi wakuu wa ulinzi na usalama pamoja na familia ya Rais Kikwete.

Rais Kikwete alisema wakati akiwa Katibu wa Chama Cha Mapinduzi (CCM) Wilaya ya Masasi, Jaji Warioba alimfuata na kumweleza kuwa anahitajiwa na Rais.

Alimpa pole na kumshukuru mwandishi wa kitabu hicho, Profesa Julius Nyang’oro kwa kazi aliyoifanya na kusema hatua yake hiyo inasaidia kuhifadhi kumbukumbu ya historia ya nchi.

“Shauku yangu kubwa ni kile utakachokiandika nitakapoondoka,” alisema Rais Kikwete na kuwaomba Watanzania kukisoma kitabu hicho kilichoandikwa kwa lugha ya Kiingereza na kutafsiriwa na Profesa Imani Swila katika lugha ya Kiswahili.

Awali, Profesa Nyang’oro alisema kitabu hicho chenye kurasa 308, ni matokeo ya mradi uliochukua miaka mitatu na kumshukuru Rais Kikwete kwa kukubali ombi lake la kumhoji mara kadhaa, licha ya majukumu mengi aliyonayo.

Alisema wazo la kuandika kitabu hicho, lilimjia kwa mara ya kwanza alipotambua kwamba hakuna wasifu mkubwa wowote ulioandikwa juu ya Rais wa Tanzania tangu wasifu wa Mwalimu Julius Nyerere ulioandikwa na William Smith mwaka 1971 hivyo akaamua kuziba pengo hilo kwa kufanya utafiti kuhusu Rais Kikwete.