Sakata la kumuua Zitto

Zitto Kabwe.

*DCI akana kumzungumzia *Amtaka afuate taratibu Na Job Ndomba, Jijini MKURUGENZI wa Makosa ya Jinai nchini (DCI), Robert Manumba, amekataa kuzungumzia madai yaliyokigubika Chama cha Demokrasia na Maendeleo (CHADEMA) ya kumuu Naibu Katibu Mkuu wa chamahicho, Zitto Kabwe. Madai hayo ni kuwapo kwa minong'ono ya taarifa za baadhi ya viongozi wa Chadema kuandaa mpango wa kutaka kumuua Zitto ambazo jana kuna moja ya magazeti ya Kiswahili lililozikariri taarifa hizo. “Siwezi kulizungumzia hili kwani kama Zitto ametishiwa uhai wake anatakiwa kufuata taratibu za kipolsi za kutoa taarifa katika Kituo chochote cha polisi ili hatua zaidi zifuatwe, na labda ungemuuliza Zitto mwenyewe kama ametoa taarifa hizo za kutishiwa katika kituo chochote cha Polisi nchini,” amesema DCI Manumba. Hata hivyo, gazeti hili hadi linaingia mtamboni halikufanikiwa kuzungumza na Zitto kwani alipopigiwa simu yake ya kiganjani, mojawapo ilikuwa ikiita na kukatwa bila kupokelewa na nyingine ilikuwa imezimwa. Gazeti hilo jana liliripoti kuwa baada ya CHADEMA kupata umaarufu mkubwana kutishia uhai wa Chama cha Mapinduzi, mkakati umesukwa na baadhi ya watu kwa ajili ya kukisambaratisha chama hicho na kwamba moja ya mikakati ya kufanya hivyo ni kuwapo kwa taarifa za viongozi wa CHADEMA kuandaa mpango wa kumuua Zitto. Mmoja wa waliotajwa katika ujumbe unaodaiwa kuandikwa na Mbunge wa Viti Maalumu wa chama hicho, Grace Kiwelu, kwenda kwa mmoja wa viongozi wa chama hicho, ni Deus Mallya ambaye alikuwa na Chacha Wangwe alipofariki katika ajali ya gari. Hata hivyo, Deus ameliambia gazeti hili kuwa tayari amemwandikia barua DCI kutoa malalamiko yake na kutaka atafutwe aliyetuma ujumbe huo.