Haki za binadamu Tanzania kujadiliwa Umoja wa Mataifa

RIPOTI ya Serikali ya Tanzania kuhusu utekelezaji wa masuala ya haki za binadamu itajadiliwa na Baraza la Haki za Binadamu la Umoja wa Mataifa Jijini Geneva, Uswisi, Oktoba mwakani.

Ili kufanikisha mjadala huo utakaoiwezesha Tanzania kupewa mapendekezo yatakayoisaidia kuboresha utekelezaji wa usimamiaji wa haki za binadamu kwa raia wake na wa nchi nyingine, itapaswa kutuma ripoti hiyo kwa baraza hilo wiki 13 kabla ya tarehe ya kujadiliwa.

Kwa mujibu wa taarifa ya Naibu Mwanasheria Mkuu wa Serikali, George Masaju kwa vyombo vya habari, Tanzania inapaswa kuwasilisha ripoti yake kabla ya Julai 4, mwakani.

Alisema ili kufanikisha hilo, Tanzania ilianza kuandika ripoti hiyo Juni mwaka huu na kwa kushirikiana na Ofisi ya Umoja wa Mataifa ya Mpango wa Maendeleo (UNDP), Ofisi ya Mwanasheria Mkuu wa Serikali iliandaa mafunzo elekezi ya awali kwa wadau.

Masaju alisema baada ya mafunzo hayo, kulikuwa na mkutano wa wadau kuhusu maandalizi kwa madhumuni ya kupitisha mpango kazi na ugawaji wa majukumu kwa wadau, ili kupata takwimu na taarifa mbalimbali zinazohitajika kukamilisha kazi hiyo.

Alisema tathmini ya utekelezaji wa utoaji wa haki hizo, itafanywa kwa nchi 192 za Umoja wa Mataifa (UN) bila ubaguzi wa aina yoyote na mapitio hayo yatafanywa kila baada ya miaka minne, kwa lengo la kuzikumbusha nchi husika wajibu wa kuheshimu haki za binadamu.