CUF waijia juu CHADEMA

*Wamponda Mbowe *Wasema si mwanasiasa *Wadai ni mfanyabiashara *Waahidi mkakati wao ni kuing'oa CCM Stella Aron na Christina Gauluhanga, jijini CHAMA cha Wananchi (CUF) kimemjia juu Mwenyekiti wa Kambi yaUpinzani Bungeni, Freeman Mbowe, wakidai kuwa si mwanasiasa bali ni mfanyabiashara. Mbowe, ambaye pia ni Mwenyekiti wa Chama cha Demokrasia na Maendeleo (CHADEMA) na Mbunge wa Jimbo la Hai, amedaiwa kuwa ni chanzo cha migogoro ndani ya chama chake na amelenga kuwavuruga wana mageuzi. Akizungumza na gazeti hili leo asubuhi kwa njia ya simu, Afisa Uhusiano kwa Umma wa CUF, Ashura Mustapha, amesema chama cha CUF hakiwezi kukiondoa madarakani Chama cha Mapinduzi (CCM) kwa mdomo bali kwa vitendo kutokana na chama hicho kuota mizizi katika utawala wa nchi. “Kama kweli CHADEMA wameazimia kufanya mageuzi ya kweli ndani ya nchi hii ni bora wakaanza jitihada za kupeleka huduma kwa wananchi kwani hicho ndicho kilio chao na hawahitaji maneno yasiyo na tija,” amesema Ashura. Amesema wamesikitishwa na kauli ya Mbowe inayodai kuwa hawajui kama CUF ni chama cha upinzani au tawala kutokana na msimamo wake wa kujitenga na kutaka kuunda kambi ndogo ya upinzani bungeni. Ashura amesema CUF kitaendelea kufanya jitihada za kuing'oa CCM madarakani kwa kuwa kimeshindwa kutatua kero nyingi za wananchi na kusababisha uchumi wa nchi kuyumba kila kukicha. Amesema wamemshangaa Mbowe kudai haitambui CUF kama ni chama cha siasa, hivyo yeye siyo mpambanaji katika harakati za kisiasa na kutaka kufanya mabadiliko ya kimaendeleo. “Mimi nashangaa wana-mageuzi nao wengine sijui vipi, huyu Mbowe anaonekana kabisa siyo mwanasiasa bali ni mfanyabiashara, kwa hiyo kumtwisha majukumu ya kisiasa ni sawa na kumbebesha tu mzigo kwani haiwezekani akashindwa kuwatambua wanasiasa wenzake,” amesema Ashura. Leo vyombo mbalimbali vya habari vimemnukuu Mbowe akidaiwa kuwa anaunda Baraza la Mawaziri kivuli lenye watu makini watiifu, waaminifu huku akikitilia wasiwasi CUF kwa madai kimeshirikiana na CCM kuunda Serikali ya Umoja wa Kitaifa Visiwani, Zanzibar. Hata hivyo, Mbowe alisema CUF wanaweza kuingia katika baraza hilo lakini kinachotakiwa ni lazima kuwapo na mazungumzo ya awali kabla ya uteuzi huo.