Tanzania Bara yatimiza miaka 49 ya Uhuru

Imeandikwa na Mwandishi Wetu; Tarehe: 8th December 2010 

 

WATANZANIA leo wanasherehekea miaka 49 ya Uhuru wa Tanzania Bara na kitaifa sherehe hizo zitafanyika mkoani Dar es Salaam katika Uwanja wa Uhuru.

Katika sherehe hizo, Amiri Jeshi Mkuu, Rais Jakaya Kikwete atakagua Gwaride la Majeshi ya Ulizi na Usalama yatakayoongozwa na Jeshi la Ulinzi la Wananchi wa Tanzania na kuundwa na vikosi vyote vya majeshi, wakiwemo Polisi, Magereza na Zimamoto.

Baada ya ukaguzi huo, majeshi hayo yatatoa salamu kwa Amiri Jeshi Mkuu ikiwemo kupita mbele ya jukwaa kuu kwa mwendo wa pole na mwendo wa kasi.

Juzi Mkuu wa Mkoa wa Dar es Salaam, Saidi Sadiki aliwataka wakazi wa mkoa huo na mikoa ya jirani, kujitokeza kwa wingi katika maadhimisho hayo.

Ili kurahisisha usafiri wa wakazi hao, Sadiki aliitaka Mamlaka ya Usimamizi wa Usafirishaji wa Majini na Nchikavu (SUMATRA) na Kampuni ya udalali ya Majembe, kutokamata daladala ambazo zitapeleka na kurudisha abiria uwanjani.

Kwa mujibu wa ratiba ya maadhimisho hayo, milango ya Uwanja wa Uhuru, itafunguliwa saa moja asubuhi ili kupisha wananchi kuingia na kujipanga katika nafasi zao.

Aidha, vikundi mbalimbali vya sanaa vitatumbuiza na Gwaride la Majeshi litaingia uwanjani hapo saa 3:00 na kufuatiwa na viongozi wa kitaifa.

Rais Kikwete ataingia uwanjani hapo saa 4:00 na shughuli hizo zitaanza rasmi.