SMZ imewaonea Dede, Offside Trick, Khadija Kopa?

Abdallah Menssah

HABARI zenu za leo mashabiki wangu wa safu hii ya ‘Kijiwe cha Burudani’, sina shaka ni njema na mnaendelea na shughuli zenu za ujenzi wa taifa kama kawaida, ikiwa ni kati ya majukumu yenu muhimu ya kila siku. Ijumaa ya leo ni siku ambayo kwa upande wangu inaingia kwenye historia muhimu ya furaha kimaisha, lakini kwa kuwa hiyo si mada ya Kijiweni, tuachane nayo tukisema haiwahusu, tuelekee moja kwa moja kwenye hoja ya msingi. Hivi karibuni, Serikali ya Mapinduzi Zanzibar (SMZ), ilipiga marufuku vibao vitatu vya Tende Harua Harua (Mlimani Park Sikinde), Top In Town (TOT Taarab) na Bata (Offside Trick) kwa madai ya kuwa vina mashairi yenye lugha chafu. Kiukweli, tukio hilo limeonekana kuibua mitazamo pamoja na hisia tofauti katika jamii, hususan kwa wenyewe, wasanii wanaohusika na adhabu hiyo ambayo kwa mujibu wa SMZ, ilizingatia maadili ya Mzanzibari. Hata baadhi ya mashabiki na wapenzi niliozungumza nao kwa nyakati tofauti jijini Dar es Salaam, kama mdau wa muziki niliye mstari wa mbele, wamedai kuwa watunzi wa vibao hivyo vilivyofungiwa hawakutendewa haki hata kidogo. Kwa upande wa kibao cha Khadija Kopa, wengi walisema kuwa haiingii akilini mwa yeyote kuwa eti kibao chake cha Top In Town ‘Mkono na Paja’ ndicho chenye mashairi machafu zaidi ya nyimbo nyingine zote za mipasho hapa nchini. Wakasema kuwa mwana mama huyo, Khadija Kopa, huko nyuma tayari alishawahi kuimba vibao vingi vyenye mashairi yanayoonekana wazi na dhahiri kuwa yamekaa kiutatanishi lakini havikufungiwa iweje leo? Aidha, wakasema kuwa kwa Sikinde ndio haikuwa sawa kabisa kwao kupigwa stop kibao chao cha ‘Tende Harua Harua’ ambacho ni utunzi wake Shaaban Dede, kwani ni cha siku nyingi mno, zaidi ya miaka mitano nyuma. Wanauliza kuwa ina maana SMZ haikuona mapungufu na kasoro za kibao hicho katika kipindi chote tangu kilipoanza kusikika redioni hadi waamue kukifungia leo wakati tayari kimeshafuatwa na albamu nyingine tele? Kadhalika, hali iko hivyo pia kwa upande wa kundi maarufu la mduara la Offside Trick ambapo mashabiki wanahoji kuwa SMZ imeshindwa kuona kasoro zilizoko kwenye vibao vya makundi mengine ya miondoko hiyo? Wanadai kuwa staili waliyoitumia Offside Trick kuimba ‘Bata’ ndio ile waliyoitumia walipofyatua kibao ‘Samaki’ mbona havikufungiwa vyote? Kinachotokea sasa ni wengi, hasa mashabiki wa makundi husika kuanza kuhisi kuwa inawezekana kufungiwa kwa vibao hivyo kunachangiwa na fitina kutoka kwa makundi mengine yenye upinzani nao wa kimuziki; kwamba, kama ingekuwa haki imetumika katika maamuzi hayo ya kuvifungia vibao vyenye lugha chafu vinavyokiuka maadili ya Wazanzibari, wengi vilio vingetawala kwenye makundi mengi kwa kufungiwa. Sitaki kujazia lolote katika hoja hizo za mashabiki, kwani nachelea na mimi kufungiwa kuandika safu hii ya ‘Kijiwe cha Burudani’, ila kweli SMZ ingelitazama upya suala la uamuzi ilioufikia wa kuvifungia vibao hivyo. Ilitazame upya kwa macho makini hasa na si kuwataka eti warekodi upya vibao vyao wakiwa wameondoa mashairi wanayoyaona wao kuwa ni machafu, kwani kufanya hivyo ni sawa na kuwarekebisha kile walichokusudia wao kukiwasilisha kwa jamii. Kwa mujibu wa wenyewe wasanii husika, kitendo hicho vilevile ni chanzo cha kuporomoka kwao pamoja na kufifia na kupungua mashabiki pamoja na wapenzi katika makundi yao hivyo kuua soko lao kimuziki. Bila kuficha kitu, japo siingilii uhuru wa SMZ katika maamuzi yao, ila ni kweli, kwa sababu hapa duniani muziki ni burudani, ambapo hakuna mtu yeyote anayependa burudani yenye sifa mbaya kama hiyo ya kupotosha jamii. Ni wazi na dhahiri kuwa ukishalilenga kundi fulani kwa kulinyooshea kidole na macho, ukiitangazia jamii kwa kusema kuwa kundi hilo linapotosha jamii, sidhani tena kama kuna mtu atakayediriki kuwa nalo karibu kwa hofu ya kupotoka na yeye pia. Namalizia kwa kusema kuwa wadau, mashabiki pamoja na wapenzi wa muziki mlioguswa na adhabu hii ya SMZ, pigeni moyo konde mkiichukulia adhabu hiyo kama changamoto katika suala zima la sanaa. Kwa herini. Wadau wangu leo ni Dogo Baraka, Bilsan Hemed, Super Shomy, Isihaka Kibene, Mohammed Mtwale, Mariam Said, Ahmed Balozi pamoja na George Nelson wa Magu, jijini Mwanza. Wengine ni Rajab Yahya ‘West’ wa Mtoni Mtongani Dar es Salaam, Asha Salum, Makorokoto, Hassan Beya ‘Shobo’, Azizi Gumgum, ‘Baba Twaha’ na Aziza Issa wa Mbagala Kiburugwa. Kadhalika kuna John Ngonile, Mohammed Rashid ‘Muddy’ na Roja Boy wa Kampuni ya Free Media Limited pamoja na Ikota Mhamila na Ben Mtwanga. Bila kuwasahau Ikota Mhamila, Bilali Makuburi na Rajab mhamila ‘Super D Mnyamwezi’ anayetuletea heshima watoto wa kiume kwa kutuuzia dawa ya ‘Enzoy’.