Sherehe za uhuru zafana

na Mwandishi wetu

RAIS Jakaya Kikwete jana aliongoza maelfu ya wananchi katika Uwanja vya Uhuru, Dar es Salaam, kuadhimisha miaka 49 ya Uhuru wa Tanganyika. Tanganyika ilipata Uhuru wake Desemba 9, 1961 kutoka kwa Uingereza, mwaka mmoja baadaye, ilikuwa Jamhuri. Iliungana na Zanzibar, Aprili 26, 1964 kuunda Jamhuri ya Muungano wa Tanzania. Viongozi wengine waliohudhuria katika maadhimisho hayo jana ni Rais wa Zanzibar, Dk. Ali Mohamed Shein, Makamu wa Rais, Dk. Mohamed Gharib Bilal, Waziri Mkuu Mizengo Pinda, Makamu wa Kwanza wa Rais wa Serikali ya Mapinduzi (SMZ), Maalim Seif Sharif Hamad, Rais mastaafu Benjamin Mkapa. Viongozi wengine ni Jaji Mkuu, Agustino Ramadhan, Naibu Spika Job Ndugai, Mkuu wa Majeshi ya Ulinzi na Usalama, Jenerali Davis Mwamunyange, mawaziri, Rais mstaafu wa Zanzibar, Aman Abeid Karume, mabalozi wanaowakilisha nchi zao hapa nchini na viongozi wa vyama vya siasa. Baada ya kufika uwanjani hapo, Rais Kikwete alipigiwa mizinga 21, kisha akakagua gwaride la jeshi na baadaye kuimbwa kwa Wimbo wa Taifa, huku ikifuatiwa na halaiki ya vijana wa shule za msingi 1,000 ambao walionyesha uwezo kwa kuandika neno uhuru kwa kujipanga kimstari. Baada ya hapo, gwaride la vikosi vya ulinzi na usalama vilipita kwa mwendo wa pole kisha mwendo wa kasi mbele ya Amiri Jeshi Mkuu, Rais Kikwete. Baada ya gwaride hilo, vikosi vyote vilitoa salamu za utii, huku vikishangiliwa na maelefu ya wananchi waliojitokeza. Baada ya gwaride kumaliza kupita mwendo wa kasi, ndege za kijeshi kutoka kikosi cha Ngerengere zilipita mwendo wa kasi uwanjani hapo na kushangiliwa na wananchi.