Sakata la Katiba mpya nchini

Tuesday, 07 December 2010 09:46

Prof. Baregu—Katiba mpya si ya Dk. Slaa. *Awatetea Mkapa, Bomani, Prof. Shivji *Adai wanao wapinga ni mambumbu Na Job Ndomba, Jijini SAKATA la katiba mpya nchini limezidi kupamba moto ambapo Profesa Mwesiga Baregu ameibuka na kudai kuwa wanaowaponda Viongozi, wanasheria na wasomi wanaosisitiza kutungwa Katibampya ya Jamhuri ya muungano ni mambumbu. Akizungumza na gazeti hili leo asubuhi, Prof. Baregu amesema madai ya kutungwa kwa katiba mpya siyo suala la Katibu Mkuu wa Chama cha Demokrasia na Maendeleo, Dk. Wilbroad Slaa, bali ni la kitaifa. Amesema wanaodai kuwa wanaomuunga Dk. Slaa mkono katika kudai katiba hiyo ni vibaraka, wanatakiwa kuelimishwa wajue umuhimu wake. “Inanishangaza kusikia kuwa baadhi ya wananchi wanapinga hoja zinazotolewa na viongozi waandamizi wakiwamo Rais Mstaafu, Benjamin Mkapa, Mwanasheria Mkuu wa zamani Mark Bomani na Mhadhiri mstaafu wa Chuo Kikuu cha Dar es Salaam, Prof. Issa Shivji kuhusu katiba mpya. Naona hao wanahitaji kuelimishwa,” amesema Prof. Baregu. Prof. Baregu amesema suala la Katiba mpya ni muhimu kwani halikuanza saa wakati Dk. Slaa amegombea Urais. “Ni kosa kusema kuwa viongozi, wanasheria na wasomi hao ni vibaraka wa Dk. Slaa. ni muhimu wananchi wakatambua kuwa hao wameona umuhimu wake hasa kipindi hiki ambapo tumebadilika kutoka mfumo wa chama kimoja kuingia vyama vingi kuanzia mwaka 1992,” amesema Prof. Baregu. Amesema madai ya kutaka kuundwa kwa Katiba mpya yalianza kabla ya mwaka 1992 wakati wa Tume ya Nyalali. Amesema Katiba ya awali ilikuwa ni ya mapokeo kutoka kwa wakoloni na tena ilikuwa ni ya mfumo wa chama kimoja kwa hiyo haikidhi mahitaji ya mfumo wa vyama vingi. Prof. Baregu amesema kutokana na dalili hizo ni muhimu kutoa elimu kwa wananchi ili waweze kuitambua Katiba ya sasa na kujua umuhimu wa kuwa na Katiba mpya. Leo asubuhi moja ya gazeti la kila siku la Kiswahili limekariri baadhi ya wananchi wakidai kuwa viongozi hao waandamizi ni vibaraka wa Dk. Slaa kwa madai ya kuunga mkono hoja ya kudai kutungwa kwa Katiba mpya ya Jamhuri ya Muungano wa Tanzania.